أكاديمية ايجيبت رايت الأدبية

اهلا بكل المتسابقين والاعضاء هنا انا كان بس ليا سؤال لإدارة الموقع او للأعضاء لو حد يعرف وسورى اذا كانت اول مشاركاتى سؤال كده بس كان فيه حاجة كده محيرانى
انا عرفت بالمسابقة عن طريق اعلانات اتوزعت فى كلية اداب عندنا بس ضاع الأعلان منى وبعدين كتبت فى جوجل يعنى اسم المسابقة وجابلى اسم الموقع بس جابلى موضوع تانى كده فى كذا موقع تانى عن حد بيسأل عن صحة إشاعة ان الدكتور نبيل فاروق هو صاحب الموقع ده ومؤسس مسابقة مصر بتكتب ايه ولا لأ وان هو مش راضى يعلن عن نفسه تواضعا و انا قلت اسأل فى الموقع نفسه أفضل واعتقد لو فعلا دكتور نبيل فاروق هو صاحب الموقع والمسابقة دى حاجة من حقنا نعرفها لأنها حاجة تفرحنا جدا كقراء ليه وبنحبه اوى
بتمنى حد يجاوبنى اجابة صريحة وشاكرة ليكو جدا

أولا: نرحب بكى عضوة جديدة فى أكاديمية ايجيبت رايت.
ثانيا: الكاتب المبدع دكتور نبيل فاروق هو قيمة أدبية كبيرة وله بصمة واضحة فى التاريخ الأدبى المعاصر وله الفضل فى إعادة اعتبار هواية القراءة عند الشباب المصرى والعربى, لكن, بكل صراحة ليس لدكتور نبيل فاروق أى علاقة بأكاديمية ايجيبت رايت أو ( مسابقة مصر بتكتب ايه), نعرف أن إعلان أن دكتور نبيل فاروق هو منظم المسابقة قد يكون خبرا جميلا جدا لكل عشاقه, وستكون دعايا جيدة جدا للمسابقة, ولكن, لايمكننا بأى حال من الأحوال استخدام اسم مثل اسم الدكتور نبيل فاروق فى الدعايا للموقع. فهذا أسلوب لم ولن نرغب فيه ولايناسب أهدافنا وصدق رسالتنا من تشجيع الكتابة بين الشباب.
مع كل احترامنا وحبنا لشخص دكتور نبيل فاروق الذى يفخر به أى شاب مصرى وعربى دون الحاجة إلى مسابقة لتعزز من تاريخه الأدبى, ولكن السؤال الأهم هو هل تصنع هوية منظم المسابقة فارقا كبيرا؟ بمعنى أخر هل يؤثر هذا على المسابقة وأهدافها؟
بالطبع لا, أكاديمية ايجيبت رايت هى مؤسسة خيرية ليست ملكا لأحد إلا أعضائها وكتابها وهؤلاء هم المؤسسون بحق لها, والمسابقة ستظل حية ماحيا أعضائها وكتابها.
نرجو أن نكون أوضحنا الصورة كاملة وأوقفنا الطريق أمام أى إشاعات, وننتظرك عضوة مشاركة فى الأكاديمية والمسابقة.
مع أطيب تمنياتنا للجميع, وأطيب تحياتنا إلى الدكتور نبيل فاروق.
إدارة الأكاديمية.

بلد اشاعات صحيح والله نكتة بجد الاشاعة دى سمعتها فى الجامعة بردو مع ان اللى كانت بتقولى عليها ولاتعرف حتى عن المسابقة حاجة هى بس شافت الاعلان وسمعت من حد ان دكتور نبيل فاروق هو اللى عامل المسابقة هو صراحة انا بموت فى كتابة دكتور نبيل فاروق وهو اللى حببنى فى القراية فعلا وهو زى ما الادارة قالت مش محتاج مسابقة تزود من تاريخه لان هو بجد شخص عظيم هو اكيد بس حد يعنى سأل حد فالحد ده سأل حد تانى والحد التانى سأل حد تالت وعلى كده لحد مابقى السؤال نفسه اشاعة
بس يارب يا سلمى نشوفك تكتبى معانا وماتبقاش اول واخر مشاركة بعد ماعرفتى ان المسابقة مش مسابقة دكتور نبيل فاروق لان زى ما الادارة قالت, تفرق ايه؟ ولا زى ماقالتلى صاحبتى اصل ممكن تبقى الجايزة نصب؟؟؟ سورى يعنى انا صريحة فى كلامى وحسانى عايزة اقول هنا نفس الكلام اللى قولته لصاحبتى, بعد إذن الإدارة, عشان الناس اللى بتشكك كتير فى المسابقة حتى لما كنت بدى اعلانات المسابقة لزميلاتى فى الجامعة كانو بيقولو تلاقيها اشتغالة! مش فاهمة يعنى هو احنا ليه دايما بنفترض الوحش وكمان بحسبة بسيطة كدة هو كان ليه إدارة موقع هتقول ان فيه جايزة لو هما مش عايزين يعملو جايزة؟؟؟ماكانو ممكن يعملو موقع كتابة زى ماناس كتير عاملة والسلام والناس هتكتب بردو ومش هيكسبو حاجة!! لكن لما يقولو فيه مسابقة وجوايز كام الف يبقى ازاى وفيه حاجة غلط واكيد اشتغالة ونصب والفتاوى الجميلة اللى اتعودنا عليها تطلع بجد حاجة غريبة ان احنا مابنفكرش لما بنعمل حاجة تافهة وبنعملها من غير حساب وساعة لما يكون فيه حاجة مفيدة نقعد نفكر ونقول ده جد ولا لأ واشترك ولا لأ واكتب ولا لأ و و و و فى الأخر نقفل الموقع احسن وننام
معلش اذا كان كلامى بطريقة صريحة كده بس حسيت انى عايزة اقول الكلام ده كله وسورى للإدارة على كلامى مع ان متهيألى كان لازم الكلام ده يتقال بطريقة واضحة كده عشان انا شايلة فى قلبى من ساعة ماكنت بوزع الإعلانات وحبيت اطلع بقى شوية
باى ياسلمى وياريت نشوفك معانا بتكتبى لأن اكيد بدال كنتى بتسألى عن المسابقة ودكتور نبيل فاروق يبقى انتى بتحبى الكتابة وياريت يكون المعنى اللى عايز اقوله وصل ونشوفك عضوة معانا ان شاء الله