أنا طفل شارع
وكلكم شايفنى ضايع
نظرتكم ليا دايما عتاب
وسؤال بيلح ع الجواب
ليه كده يابنى؟
وماحدش عايز يكسب فيا ثواب
وقبل ما يجى يعاتبنى..
يجاوبنى..يفهمنى..يقوللى
مين الجانى ومين المجنى عليه
مين قتل ومين بينقتل..
كل يوم وهو مش عارف ليه
بس هقول ايه
ماأنا طفل شارع
وكلكم شايفنى ضايع
ومعاكم حق ما خلاص..
أنا فى الشر بقيت استاذ بارع
وفيها ايه..
ماأنا للدنيا خلاص بايع
آه فيه خير..بس قليل
آه فيه حاجات حلوة كتير
آه فى آيادى بيضا...
أنا عنها سامع
بس بينى وبينها..
ألف مانع ومانع
وهقول ايه ما انا طفل شارع
وكلكم شايفنى ضايع
فاكرنى مبسوط
ومش عايز أمشى مظبوط
أبدا والله
ده أنا لما بشوف حد رايح مدرسة
بنسى العالم واللى فيه
وبفضل أبص عليه..شايل شنطته
وأبوه وأمه من حواليه
وبتمنى أكون انا مكانه
ومش عايز حاجة تانى
وأنا يعنى ساعتها هعوز ايه
ببكى..على حظى أنا ابكى
وبسأل.......
_ومين يعنى سامعنى _غير نفسى
ليه يا أمى..ليه سيبتينى ليه
هو أنا زعلتك
طيب أسف..بس تعالى
وخدينى م اللى أنا فيه
هقول ايه...
ربنا يسامحك ع اللى فيا عملتيه
هنساكى مع انى أصلا..
مش عارفك ولا حتى عارف..
شكلك ايه
أنا بس عارف انى طفل شارع
آه اللى يشوفنى يقول عايش
لكن من جوه...
دمار وخراب قاعد وفارش
كل شىء فيا مات
قلبى وعقلى وروحى
ذكريات جميلة..مجرد ذكريات
بس خلاص أهو كله فات
وكل شىء بقى خد وهات
ان كان ع الأكل..
فأنا يكفينى الفتات
بس الحنان..الأمان
حاجات ساعات بفكر فيها..ساعات
لكن أرجع وأقول..خيالى واسع
ولازم أنسى وأعيش الواقع
بس برضه لسه بفكر
وهفكر تانى وتالت ورابع
ايوه أنا طفل شارع
وكلكم شايفنى ضايع
بس ع الاقل ليا احلم
ليا فى خيالى أطير
وكأنى عصفور من العصافير
هتخيل انى بقيت غنى
وساعتها هكون كريم
وعمرى ما هكون بخيل
أيوه هفضل أحلم وأحلم
وأنا ليا ايه غير انى أحلم
آه غيرى عايش فى الواقع أحلامى
وف كل يوم بيغتالوا آمالى
هسيبنى منهم..أنا مستغنى عنهم
وأتفرغ لحلمى..وأخيب أملهم
فى حلمى وصلت.......
انى بقيت انسان عظيم
حاجة كده زى وزير
وف يوم اتقدمت لبنت سفير
طبعا رفض وقال صعلوك..حقير
كان ف يوم طفل شارع
والدنيا ضحكتله وبقى..
لكل شىء هو طامع
حتى أحلامى..بتتحول لكابوس
حياتى كلها ضلمة..
مفيهاش أى نور
ولو حتى..كان بفانوس
ماأنا طفل شارع
أيوه ضايع
بس أعمل ايه
أدينى عايش..ما أعرفش ليه
عمرى بيضيع..
ومش زعلان عليه
ويارب بقى ينتهى..
وأسيبلكم العالم باللى فيه
وأنا يعنى هفرق معاكم ايه
ما أنا طفل شارع
وكلكم شايفنى ضايع
![صورة](http://www.3rbpic.com/love/sad2/wed__.jpg)