الفكرة بإختصار زى ما الموضوع بيقول...ألف قصة قصيرة فى موضوع واحد...طب إزاى...؟
الموضوع ده هيبقى زى دفتر حضور...بما إن كلنا الأيام دى مشغولين بالإمتحانات..فمش عارفين نركز فى كتابات كتير...فكلنا بندخل ومانكتبش...فالموضوع ده هيبقى موضوع واحد نكتب فيه قصص من نوعية القصص القصيرة جدا...مابين سطر واحد ولا تتعدى السطرين و التحدى فى كل ما كانت القصة أصغر ووصلت فكرة عميقة جدا...
كمان بمناسبة الصراع العنيف فى الأكاديمية بين حزب الرجل و حزب المرأة فهنستغل الموضوع ده فى إننا نشوف مين هيكتب عدد أكبر من القصص فى الألف قصة...وبردو بشرط إن القصة توصل معنى
أهم حاجة يبقى فيه نظام ومساواة بين الأحزاب عشان كده كل واحد ممكن يكتب 3 قصص متتالية...بعد كده ماينفعش يكتب قصة جديدة إلا لما حد تانى غيره يرد...وده منعا لأن حد من الحزبين يمسك الموضوع وهاتك ياكتابة فى الألف قصة لوحده عشان حزبه يفوز
بعيدا بقى عن الأحزاب نيجى للجد...أنا شايف إن الفكرة دى أولا هتسهل كتابتنا لأعمال بسرعة فى فترة الإمتحانات وكمان بعدها إن شاء الله...ده غير إنها هتفيدنا فى خروج أفكار جديدة ومتنوعة فى سطر واحد ممكن نحولها بعد كده لقصة قصيرة عادية...يعنى الموضوع هيبقى فايدة أدبية لينا كلنا...وكمان هنعملها مسابقة ونختار أفضل القصص واللى طبعا هتكون من قصص حزب الرجال
يلا نبتدى الموضوع و مسابقة الألف قصة قصيرة انهارده بتاريخ 18 يناير 2009 ونشوف هنخلص الألف قصة أمتى
هأبدا أنا عشان أدى مثال, وعايز بس أقول ملحوظة عشان ننظم الموضوع...اللى يكتب قصته وعايز يكتب تعليق يكتب قصته وبعدين سطر بسيط كده وبعدين التعليق اللى هو عاوز يقوله ردا على قصة اللى قبله أو أيا كان رده بس يكون مختصر...عموما زى المثال اللى هأكتبه دلوقتى وهنبدأ بيه مسابقة الألف قصة