طبعا أنا كتبت قصة قبل كده بالعنوان ده ( سكوت هننافق ) ..و فكرت الأيام دى أحولها لسلسلة ساخرة مشتركة ومفتوحة..بمعنى إن أى زميل فى الأكاديمية جديد أو قديم ممكن يكتب جزء من السلسلة دى..ينقد فيها ظاهرة سلبية مجتمعية أو فنية حاسس فيها بالنفاق..ومش هأتكلم كتير..هأسيبكوا تتعرفو عالفكرة من أول حلقة 
.........
أى تشابه بين شخصيات هذا النفاق وبين الواقع هو تشابه مقصود مع سبق الإصرار والترصد
.........
وسكوت...تعالوا ننافق...بيقولوا إن السينما هى الفن السابع...بس اللى حيرنى دايما هو المغنى يبقى الفن الكام...وبعد تفكير عميق وبحث دقيق.. لقيت أنه فى أيامنا دى المغنى بقى الفن ( الواقع )!
أنا مش عايز أنقد حال الفن..أكيد سمعنا من الكلام ده كتير..أنا بس اللى بيضايقنى..ليه الفن بقى نفاق..؟ وليه الشخصيات الفنية أغلبها منافق؟ منافق ليه؟ أقولكم...
لما يتسابق كل المطربين لغنا الأغانى الوطنية..مع أنهم أكيد ساقطين ( تربية وطنية )..وأكيد ما يعرفوش أى حاجة عن انتماء لبلدهم..ولما واحدة أنيقة رشيقة تطلع ( تطربنا ) برائعتها ( ماشربتش من نيلها ) وتتغزل وتتبختر وتتجمل وتوصف فى جمال عيون مصر...وشوية تقف بحجاب وعلى سجادة الصلاة والدمعة هتفر من عينها! واحنا نصقف..وبعدها بدقيقة تطلع بفستان مكشوف وإحنا نصقف!..ونصقف ونصقف! ونقول تحيا مصر و يحيا الفن ويحيا النيل وتحيا اسمها ايه...المهم..إن بعد وصلة الغزل والعشق فى مصر...وبعد وصلة التحية والتقدير من الشعب لممثلة مصر الأولى..وسفيرة أبو الهول الحسنة...تطل علينا الأخبار بأن الفنانة الوطنية جدا راحت خلفت فى أميريكا وابنها خد الجنسية الأميريكية! والظاهر إنها لما كانت بتقول ما شربتش من نيلها..طب جربت تغنيلها..كانت بس بتجرب! أو كانت قصدها النيل بتاع نيويورك وإحنا فهمناها غلط.. بالذمة مش ده نفاق...؟!
وسكوت...هننافق...مطربين اتنين تانيين عزيزين على قلبى جدا جدا..سمعنا عن قضيتهم الشهيرة لما اتحبسوا..عشان زوروا أوراق الخدمة العسكرية عشان يتفرغوا رسالة الفن والغناء ( النبيلة )! طبعا ده ما كانش غريب يعنى..اللى كان غريب فعلا..وصلات التأييد الشعبية اللى حظو بيها ساعتها! و حرقة الدم لما تمشى فوق كوبرى ستة أكتوبر وتشوف لوحة الزعيم الشعبى المطرب المسجون مطالبين بالإفراج عنه! بصفته أدى خدمات ( جليلة ) للوطن...ايه يعنى زور..؟! وايه يعنى هرب من الجيش..؟ كله كلام فاضى!
ايه بقى الكلام اللى مش فاضى...انهم بعد خروجهم من السجن الخمس نجوم اللى كانو فيه...كان من أوائل الحفلات اللى أحييوها هى حفلة العبور! إنتصار 6 أكتوبر! اتخيلوا حرقة الدم لما اتنين لسه طالعين من الحبس العسكرى بتهمة الهروب من العسكرية...ويطلعوا منها يغنوا للجيش والوطن والإنتماء..ويتفرج ملايين المصريين بحرق دم على الهربانين من الجيش وهما بيغنوا للجيش...بالذمة مش ده نفاق...؟!
كفاية انهارده بقى عجايب..
و سكوت..كفاية نفاق...
..خبطت في كل الناس
...
