أكاديمية ايجيبت رايت الأدبية

أزيكو يا أكاديمية بصراحة أنا لقيت عدد كبير من أجمل الأعضاء فى الأكاديمية متجمعين اونلاين فحبيت أعمل موضوع الكل يشارك فيه زى ماحصل فى موضوع رباعيات الأكاديمية كده بس هنا هنتجمع على لعبة ومش عارف لعبة ايه صراحة استنو افكر......
اه جاتلى فكرة نلعب كرسى الإعتراف؟ لأ قديمة طب كنبة الإعتراف يوووه هى هى بردو
لأ بجد جاتلى فكرة حلوة المرة دى...لو هنعمل حكومة هنا فى الأكاديمية وعايزين نقسمها لوزراء أنت هتبقى وزير ايه وترشح مين لوزارة ايه؟؟؟
انا مثلا برشح نفسى لوزارة البيئة...عشان ما أعملش حاجة خالص وبرشح تنهيدة وزيرة للجواز بنخترع وزارات جديدة واحنا قاعدين
وبرشح همسه لوزارة التربية والتعليم مش عارف ليه وخالد لوزارة العدل عشان اللى يضايقه يعتقله هههههه
يلا كل ماتيجى فى بالى وزارة جديدة لحد هأكتبها مستنى وزارتكو بقى بسرعة

ههههههه كده تبيعنى يا أمير ماتفتكرنيش بحتة وزارة صغيرة على فكرة انا كنت بردو مضايقة وبفكر اعمل موضوع فى اقسام الضحك وانت سبقتنى بقى مش مشكلة
المهم يلا هأعلن التشكيل الوزارى الجديد بتاعى
همسه: وزارة الشعر
تنهيدة: وزارة الحب
خالد: وزارة مش عارفة
أستاذ مسعد: وزير الحكمة
أحمد الصياد: وزارة المشاعر
ايه رأيك فى الوزارة الرومانسية اوى دى
اه صحيح نسيتك
الامير الحائر: وزارة الفول والله كل الناس هتحبك ههههه
يلا عشان ماتنساش تدينى وزارة تانى بااااااى

بقى كده يامريم وانا اللى كنت شايلك وزارة كبيرة لما تيجى تقومى تقوليلى نسيتك...ابقى شوفى مين هيديكى الوزارة بقى
وفول فول احنا بيهمنا بس حلوة اوى وزارة مش عارفة دى مش دى اللى جمب وزارة ماليش دعوة

ليه ياوليد انا لوزارة التربيه والتعليم شايفنى جامده اوى كده ده انا غلبانه والله
بس تنفعنى وزارة الشعر لايقه عليه اوى ميرسى يامريم انك اخترتيها لى
انا مستنيه التشكيل الوزارى بتاعكم عرفونى بيه بسرعه علشان احدد موقفى مع الشعب ولا انتوا رايكم ايه

وهو مين قال بس ان وزارة التربية والتعليم جامدين...دول كلهم عالم 100 100 ومنورين المدارس مش بيعملو حاجة صراحة
انا بس قلت انتى طيوبة وهتنفعى مع الطلبة الغلابة وكمان تنهيدة هتنفع فى وزارة الجواز عشان هى رومانسية بقى زيى وهنوفق كل الشعب فى الحلال
سيبك من وزارة الشعر بتاعة مريم دى عشان أنا اللى هأكسب فى الأنتخابات ووزارتى هى اللى هتمشى
أنتخبونى....رمز الجمل

هههههههههههههههه هى بقت كده ياوليد رمز الجمل وكده خلاص بدال هنقلبها انتخابات


انتخبونى رمز الوردة
واللى مش هينتخبنى هأعتقله بعد اما اكسب عشان انا بحب الديموقراطية

اوكى ياهمسه بما انك اتهورتى وانضميتى للحزب بتاعى فاستلمى القرارات
اولا كده احنا حزب مالناش خطط..يعنى ماشيين ببركة دعا الوالدين وربنا يسهل
ثانيا بقى اللى عاجبه نظام الحزب يشترك اللى مش عاجبه يشترك فى اى حزب تانى تطبيقا للديموقراطية وانا بوعد ان فى جدولى الانتخابى هنطلع كل مواطن مصرى رحلة لمارينا كل ويد ايند وهمسه هأعينك وزيرة السياحة والأثار عشان تفسحى الشعب بعيد عننا عشان مايكلمش فى السياسة
المهم انتخبو رمز الجمل

بصراحة ياوليد افكارك جميلة اوى انا بس كنت عايزه أسال لو الانتخابات حتكون نزيها عشان ارشح نفسى لانى عندى شوية وزارات جديدة كنت عايزه اعرضه عليكو
وحيكون تشكيلى الوزارى منصف للجميع

طبعا ياتنهيدة الأنتخابات نزيهة جدا وهنجيب مراقبين أجانب من الصعيد
يلا بسرعة مستنى أسمع تشكيلك الوزارى ولازم 99 % من اغلبية شعب الأكاديمية يوافقوا عليه عشان نعتمده ديموقراطية بقى وابقى دخلى همسه فى وزارتك عشان هى شكلها سابت رمز الجمل لما سمعت ان فيها زارة السياحة ومارينا
ومريم رمز وردة ايه بس انتى بتشكلى وزارة ولاجنينة