جنـنـوووني !! ح3 (علي ماما ..و الأربعين عروسة !)

[Ghadat2009]

شهاب داخل العيادة و هو فطسان من الضحك و هات يا تريقة على د.سمية الغلبانة !

شهاب : اتفضلي يا دكتورة سمية ... و اوعي تزعلي مني أنا باهزر ! و بعدين انتوا زعلكوا وحش أوي ...يعني اوعي تقوليلي هتبقي سامي بدل سمية...هاهاها ....بس و الله فكرة ! ساعتها مش هتحتاجي أخ تبهدليه معاكي ... يعني هتبقي مع نفسك ولا ..نقول نفسكوا ...هاهاي !
سمية : شهاااب ! بطّل بقى زهقتني !
شهاب : خلاص خلاص ..كفاية عليكي كده ! على فكرة معاد النهارده أمان انشاءالله .... عملت تحرياتي و لقيته لا قتال قُتلا و لا نص نص و الحاجات دي ! مبسوطة منّي ؟
سمية : و الله أنبسط أكتر لو تبقى رايح جاي عليّا كده زي الشاطر ! مش قاعد عالمكتب برة و لا انت هنا ! و لا كأن ليك أخت بتعاني من الناس الهِس هِس دول !
شهاب : أوووو ! ايه اللي بسمعه دا ؟أمال راحوا فين" الناس اللي محتاجين مساعدتنا" ؟ و اللي هم "كويسين بس ظروف حياتهم تاعباهم " قوام نسينا كوووولّ الكلام ده ؟ هه؟ و بقوا " هِس هِس " !
سمية : يوووه ! انت مستقصدني ليه النهارده يعني ؟ خلينا في الشغل لو سمحت !
شهاب : طاااايّب يا ست سمية ! خلّيييينا في الشغل ! النهاردة : المريض اسمه : علي أمجد عز الرجال
سمية : ياه ! دا اسم حلو و فيه رنّة كده ! هييجي الساعة كام ده ؟
شهاب : أفتكر الساعة اتناشر ! بس قال انه هيتأكد و بعدين هيأكد عليّا ..
سمية : طب مش هتشرب الشاي معايا ؟...ليه تسيبني قاعده لوحدي كده ؟
شهاب : و اللهِ أنا مش فاهم انتي عايزة ايه؟ مرة سيبني ومرة متسيبنيش !
سمية : خلاص ياسي شهاب ! فِهمنا ! بس لما ييجي علي ده تبقى تدخل من وقت للتاني ..يعني ..تطّمّن ان ما فيش حاجة غريبة و لاّ مش طبيعية !
شهاب : مافيش مشكلة !

وقبل الميعاد بنص ساعة ... دخل شهاب و هو مستغرب ..
شهاب :تصوري ؟ وصلوا ! أدخّلهم و لاّ ايه ؟
د.سمية : تدخلهم ايه بس يابني ؟ هوّا أنا بعالج مجموعة على بعض ؟ دخّله لوحده طبعاً !
( ايه الأصوات و الدربكة دي كلها ؟ هو شهاب بيتخانق معاهم و لاّ ايييه؟ يوووه ايه اللي داخلين مع بعض دوول ! أفّ ... حنبدأ بقى !)

و يدخل شاب في إوائل الثلاثين من عمره .. وشّه عليه علامات الأسى و الإحباط ... ايه ده ؟ ده شكله هيعيّط ! ومعاه واحده شكلها كده مامته

د.سمية : معلش بس مش حينفع حضرتك معاه ..حضرتك مامته مش كده ؟طب نستناه بره لو أمكن ؟
الأم : و ليه يعني ؟ ماهو مافيش أسرار تستخبّى عنّي ! ثمّ دا أنا اللي حاجزالَه هنا عشان أعرف ماله بس ؟
د.سمية : بس و الله ماينفعش يا تانت !
الأم : لأ ... هينفع و لاّ هنمشي من هنا !
د.سمية (تبدأ تجز على سنانها بدري أوي النهارده !) : هوّ ممكن النهارده بسّ! لكن لو سمحتي حضرتك الجلسات الجاية هو لوحده ! OK?
الأم : هنشوف .... هنشوف !
د.سمية (أمري لله ! لمّا نشوف آخرتها!) : ليه ما استكملتش البيانات مع شهاب ؟
علي : أصل .....
الأم : يعني احنا قلنا مانضيعشي وقت ...و منها نتكلم مع بعض و تعرفي علي مالو بس ؟
د.سمية : طيب بلاش فعلا ناخد وقت و ممكن البيانات ناخدها من صورة البطاقة مثلا ؟ إيه رأيك يا أستاذ علي ؟
علي : ما فيش مـ ......
الأم : تمام كده!
د.سمية :ايه اللي مضايق حضرتك ؟ و لو مش عارف بالضبط ممكن تحكي لي عن .....
الأم : شايفة ! .... أهو على طول كده ! لا كلام و لا سلام ...مش عارفة مالُه ؟؟
د.سمية ( إيه الست دي ؟ مش عارفة ماله؟هو لاقي فرصة يتنفس ؟) : طب ممكن أكلم حضرتك يا تانت لحظة بس على جنب ؟
الأم : أوي أوي !
(و يقوموا هم الاثنين يقفوا جنب الشباك اللي عند المكتبة )
د.سمية (دي مش هينفع معاها غير خطة سبعميّة و سبعة !) : باقول لحضرتك ايه ... احنا هنعمل حركة كده يمكن يتكلم ! يعني انا و حضرتك هنسكت خمس دقايق بس و هو يعني يمكن يزهق و ينطق بأي حاجة ! هه ... ايييه رأيك ؟
الأم : مممم ... فكرة برضه !
د.سمية : هيه يا أستاذ علي .. قولّنا بقى ايه المشكلة اللي مضايقاك؟ بس بسرعة الحق اتكلم ... هييه!
علي : عااايز أت...جااا...وّز !! مش عاارف اتجوز!!
د.سمية : يا سلام !! طب ما تتجوز ! هاهاها ... باهزر؟ بايخة؟ احم ...طيب مشكلة ماديات زي العادة؟
الأم : ما أصله كمان .............
د.سمية (تغمز بغيظ للأم و تجز على سنانها و كمان تبتسم ابتسامة صفرااا) : يا تانت لو سمحتي سيبيه ثانية بس !
علي : أنا عندي شقة ... هي صغيرة صحيح بس هوّه دا اللي اقدر عليه ! و معايا فلوس شايلها للجواز ...مش كتير ... بس اعمل ايييه هي دي ظروووفي ! و كمان ...يعني ماما ....
الأم : مالها ماما يا سي علي ؟
علي : وا ... ولا حاجة ... هوة كده كده .....ما فيش فايدة !
د.سمية : يا جماعة اهدوا ... و نحاول نحل الموضوع !
الأم : أنا عارفة كان هتقول ايه ! هشهّدك عليه يا دكتورة ...أنا قلت له مش هساعده في تجهيزات الجواز مادام منشف دماغه كده ! قال ايييه ...عايز يتجوز اللي تحبه و ترضى بظروفه ...بس محدش بيرضى بظروفه و هو مش بيرضى باللي أنا باختارهم له !
علي : ياماما خليني اتكلم مرة عن نفسي ! دا أنا صحابي مسميني " علي ماما " من كتر ما أنا مش عارف أعمل حاجة بدماغي أنا ! حتى اختيار الكلية .....الشغل و دلوقتي كمان العروسة ! حرام ...حرام !!
الأم :أنا مش فاهمة ايه اللي حصل له ده ؟ كل ده عشان شفنا 39 عروسة و ما حصلشي نصيب؟ راكب دماغه ان آخر محاولة هي اللي جاية ...
علي : ما فيش فايدة أنا مش مكتوب لي أتجوز ...أنا ولا حاجة ... ولا حاجة!
(ايه ده ؟ ده بيعيط جامد أوي ..يا حرااام!)
د.سمية : ليه تقول كده يا أستاذ علي ؟ انت شاب وسيم و عاقل و بتشتغل شغلانة كويسة و.....
الأم : طب و الله فكرة ! ما تيجي ..... يعني ... تكمّلي الأربعين !
د.سمية : نعممممم ؟ أ أ كمل ايه بالضبط ؟ هو مييين اللي الكشف بإسمه؟
الأم : انتي ...انتي مرتبطة ؟؟؟ هيييه قولتي ايييه ؟

(علي ... يبص لها باعجاب مع ابتسامة من الودن اليمين للودن الشمال )
د.سمية : ايه ؟ مين ؟ ازاي؟ يا شهااااب ... رحت فيييين ؟ الحقنووني .... حيجننووني !!

[الأمير الحائر]

بجد الجزء ده الكوميديا كانت عالية فيه أوى...! ومش عارف إزاى قدرتى تلقطى الفكرة من تعليقى على صورة مرجانة والأربعين حرامى...! وإستخدمتى الفكرة كوميديا بشكل حلو أوى...واضح إننا معانا كاتبة كوميدية من الطراز الأول
وكالعادة بردوا زى الجزأين اللى فاتوا...كوميديا بتنقد قضية وحالة سلبية جدا فى المجتمع..." على ماما " وكل من بيعيش لحد أخر عمره وهو ما يروحش يمين ولا شمال إلا بأمر مامته...ومايعرفش يعمل حاجة لنفسه أبدا ولا يعتمد على نفسه فى أى حاجة...وأنا شفت كتير من العينة دى وبجد فعلا محتاجين دكاترة كتير ولا مستشفى. مش دكتور واحد...!
على فكرة الجزء ده أكتر جزء بردوا حسيت إنى شايف الشخصيات أوى..يعنى شفت شهاب أخوها بدمه الخفيف وتريقته المنطقية على أخته بس بحب..و يعنى حسيت دكتورة سمية دى شخصية لذيذة جدا ومرحة ولابسة نضارة شيك لونها دهبى ( مش عارف ليه هى ركبت معايا كده ) بس شكلها حلو و ابتسامتها جميلة جدا! قوليلى صحيح... هى دكتورة سمية مرتبطة؟
والله جزء رائع ياغادة وتميز فى التقاط الأفكار...ومستنيين الجزء الجاى

[Ghadat2009]

بجد الجزء ده الكوميديا كانت عالية فيه أوى...! ومش عارف إزاى قدرتى تلقطى الفكرة من تعليقى على صورة مرجانة والأربعين حرامى...! وإستخدمتى الفكرة كوميديا بشكل حلو أوى...واضح إننا معانا كاتبة كوميدية من الطراز الأول
وكالعادة بردوا زى الجزأين اللى فاتوا...كوميديا بتنقد قضية وحالة سلبية جدا فى المجتمع..." على ماما " وكل من بيعيش لحد أخر عمره وهو ما يروحش يمين ولا شمال إلا بأمر مامته...ومايعرفش يعمل حاجة لنفسه أبدا ولا يعتمد على نفسه فى أى حاجة...وأنا شفت كتير من العينة دى وبجد فعلا محتاجين دكاترة كتير ولا مستشفى. مش دكتور واحد...!
على فكرة الجزء ده أكتر جزء بردوا حسيت إنى شايف الشخصيات أوى..يعنى شفت شهاب أخوها بدمه الخفيف وتريقته المنطقية على أخته بس بحب..و يعنى حسيت دكتورة سمية دى شخصية لذيذة جدا ومرحة ولابسة نضارة شيك لونها دهبى ( مش عارف ليه هى ركبت معايا كده ) بس شكلها حلو و ابتسامتها جميلة جدا! قوليلى صحيح... هى دكتورة سمية مرتبطة؟
والله جزء رائع ياغادة وتميز فى التقاط الأفكار...ومستنيين الجزء الجاى

يعني مش عارفة اقولك ايه ؟ تعليقك فوق الوصف أبهجني جدا ! و طبعا موضوع التقاط فكرة نمن حكاية علي بابا .. فاعتقد غالبا سببه اسلوبك في الكلام عن الحكاية دي ... الأسلوب الملهم ده بيخرج افكار و يفجر طاقات !
اما (كاتبة كوميدية من الطراز الأول ) اطراء كبير انا مش قده !
اما (عن حالة علي ماما) فأنا شفت نماذج مؤسفة ليه ! حادة صعبة و تزعّل بجد ... أتمنى انهم يتغيروا من غير ما يغضبوا أمهاتهم
اكتر شيء جمييييل فعلا : انك بقيت شايف الشخصيات ! و بدأت تتخيلهم كمان !
باشكرك جدا للقراءة و التعليق الرائع جدا !

[hala]

ويستمر التألق والتميز و الابدااااع..... مش جديد عليكى يا غادة الافكار الجميلة والتعبير الواقعى عن حياتنا بأسلوبك الساخر الجميل ....... بس قوليلى : شوفتى فوازير الخاطبة !!

[تنهيدة]

روعة واللهى ياغادة ...وفعلا أنا أبتديت أصدق أنك مش أول مرة تكتبى كتابات كوميدية ..أنا حاسة ان عمرك ماكتبتى غير كوميدى بس ده دليل ياغادة انك كاتبة جامدة جدا لانك فى كل انواع الكتابة تحسسى القارئ انك متمكنة جدا...كل مرة بقول ان ده احلى من الا قبلة لان بجد كلهم ياغادة يجننو ..وطبعا أنا بحب جدا الكوميدية الا بتنتقد الواقع وانتى أخترتى موضوع المرة دى انا عن نفسى بشوفه كتير وبتمنى لو ينقرض عشان ارتاح...حقيقي ياغادة جو المذاكرات عجبنى جدا وأنا كمان حسيت اوى شخصياتك وأسلوبك الجميل بيخلين فعلا أشوفهم وأنا بقرأه ...بحيكى ياغاده ومستنية الجزء الجاية وأنشاء الله دايما بالتوفيق

[Ghadat2009]

روعة واللهى ياغادة ...وفعلا أنا أبتديت أصدق أنك مش أول مرة تكتبى كتابات كوميدية ..أنا حاسة ان عمرك ماكتبتى غير كوميدى بس ده دليل ياغادة انك كاتبة جامدة جدا لانك فى كل انواع الكتابة تحسسى القارئ انك متمكنة جدا...كل مرة بقول ان ده احلى من الا قبلة لان بجد كلهم ياغادة يجننو ..وطبعا أنا بحب جدا الكوميدية الا بتنتقد الواقع وانتى أخترتى موضوع المرة دى انا عن نفسى بشوفه كتير وبتمنى لو ينقرض عشان ارتاح...حقيقي ياغادة جو المذاكرات عجبنى جدا وأنا كمان حسيت اوى شخصياتك وأسلوبك الجميل بيخلين فعلا أشوفهم وأنا بقرأه ...بحيكى ياغاده ومستنية الجزء الجاية وأنشاء الله دايما بالتوفيق

ربنا يخليكي يا أجمل و أرق نهاد في الدنيا على كلامك الراااااائع جدا !
و علي ماما منتشر جدا و بيضايقني جدا و اكيد نفسي ينقرض بس مع الحفاظ على العلاقة الطيبة مع الأم !
أنا في منتهى السعادة لفكرة انك تقدري تشوفي الشخصيات من خلال القراءة ... و أنا اللي بحييكي و اتمنى لك كل خير و نجاح !

[Ghadat2009]

انتى تستحقى لقب اميره المنتدى...بكل تاكيد ..وانا استحق جزمه احترام المنتدى

أشكرك جدا على مرورك الجميل ..... و ايه الألقاب دي بس ؟
أنا سعيدة ان العمل ده عجبك .. بس انت بجد متميز في روايتك المشوقة !

لي رجاء فقط .... بلاش تستخدم كلمات ممكن تكون مهينة بأي شكل عشان محدش فهمك غلط !

[المهاجر]

تماموز يا ام الغداغيد كدا الله ينور الواحد نفسه يضحك وما كانش ليه نفس بس معاكى ضحك ايييييييييييييييييه دنيا

[Ghadat2009]

تماموز يا ام الغداغيد كدا الله ينور الواحد نفسه يضحك وما كانش ليه نفس بس معاكى ضحك ايييييييييييييييييه دنيا

مين تماموز ده ؟ و ايه ام الغداغيد دي
سعدت بمرورك و أسعدني جدا أن العمل عجبك و أضحكك ... ألف شكر ليك على التشجيع

[لوسفير]

من الواضح يا غاده انك خصم لا يستهان به فى قسم المذكرات الكوميديه ..والامير الحزين فى الروايات...ورائع شفتى انا مبعرفش انقد الاعمال الجميله التى تقدميها