أكاديمية ايجيبت رايت الأدبية

كنت بفكر
انى عشان ما بحب الناس
يبقى الناس كلها تتحب
و ان امنا واحدة اسمها حوا
وكمان واحد هو الأب
وان الناس زى ما تديها
تاخد منها و تشرب حب
كنت بفكر
ان الدنيا لسة بخير
وان الخير ده ما هواش صعب
وان العقل فى قلب الراس
والاحساس ساكن فى القلب
كنت بفكر
انك لما تمد الايد
للغير.. يدعيلك بالخير
بس خلاص
انا شفت العالم بعيونك
و اتحققت بكل ظنونك :
عاوز تكسب حب الناس
اعمل زى الناس بالظبط
قول انك واحد متربى ..
والاخلاق اخلاق منحط
عاوز تكسب حب الناس :
مثل ع الناس طول الوقت
(( هاله ))

معنى كده بقى اننا هنقضى حياتنا تمثيل.

لا ياهالة أنا مش معاكي أبدا !! اللي هيعمل كدة هيتعب جدا... يعني اللي جواه عكس اللي بيظهره عنده نوع من الفصام و بمعنى آخر بيبقى منافق !!
ماتندميش غالحب و الخير ! متستنيش الشكر .. و بعدين الناس انواع : اذا اكرمت الكريم ملكته .. وان انت اكرمت اللئيم تمردا !
انا لاحظت عبارة (كنت بافكر) لما كان الكلام ايجابي و فجأة اقتنعتى بوجهة نظره (هو مين ده؟) رأيي استمري في تفكيرك انتي و سيبك من افكاره !
بس الشعر اللي انت كاتباه - بعيدا عن المعنى - واضح و بيوصل المعنى بسرعة

لكل من غادة و لارا : لا تسعفنى كلمات الشكر لاستجابتكما السريعه للرد و التعليق على كل ما أكتب . وبما ان بقينا اصحاب فعلا فاسمحولى اقولكم ان العمل اللآدبى لا يعبر بالضرورة عن آراء واتجاهات كاتبه - ربما يحدث ذلك - وربما يكون مجرد تعبير عن حالات اخرى لا تستطيع التعبير عن نفسها .. ذلك ان الادب انعكاس للواقع ..ولذلك عايزة اعرف رأيكم بصراحة ... العيوب الفنية قبل المميزات ...
علشان اقدر اطور من نفسى .... و رحم الله امرأ اهدى الينا مساوئنا .

أسلوبك بسيط وبيوصل للقلب بسرعة ياهالة بس حاسس العنوان مش أفضل العناوين المتاحة والمناسبة للعمل ...وفعلا أنا مع رفضى الشخصى للفكرة لكن تعاطفت مع الحالة اللى اتغيرت بسبب غدر حد ليها وتحولت أو كادت إلى التطبع بطبعه...وفعلا ده واقع إجتماعى كتير بيعانوا منه وأنا وغيرى أكيد فى لحظة جربنا التحول ده بسبب مواقف حصلت لينا...لكن تبقى النهاية إن البشر مختلفين فى عقولهم وقلوبهم وغلط نحكم على الكل بتجربة واحدة...
تحية على القصيدة الجميلة ياهالة...

قصيدة جميلة قدرتى توصلى الفكرة ياهالة بكل بساطة ...مع انى شايفة ان الناس فعلا هى الا بتخلى الناس تمثل عليه لكن انا مازالت رفضة فكرة التمثيل مهما كانت الضغوط وعندى أمل اننا نلاقى الناس الا طريقهم الوحيد هو الصدق ...ولو الناس قدرت تغيرنا يبقى احنا كمان كنا بنمثل ..بحيكى ياهالة على نشاطك الجميل