أكاديمية ايجيبت رايت الأدبية

من هم كتابك المفضلين؟..الذين أثروا في تفكيرك؟..أثروا في كتاباتك؟..الان أو قديما..الكتاب الذين تلتقط كتابتهم على الفور بدون ان تقلب في الكتاب..من الأدب العربي أو الأدب اعالمي

نريد أن نعرف..

انا بحب جدا .فاروق جويده ونبيل فاروق. وبعض اعمال احسان عبد القدوس. اجاثا كريستى.وابراهيم الفقى.

بس سؤال جميل اوى ياهبه

هبة اللى ساعات تتواجد دايما فى كل أقسام الأكاديمية وتبقى نحلة نشيطة فى الخلية ومرة واحدة تغيب ولا كأنها معانا
بس حمد الله عالسلامة يا هبة وبجد موضوع جميل كالعادة...بالنسبالى أنا هتبقى اللسنة صغيرة أوى...لأنى انقطعت علاقتى بالأدب مدة طويلة من ساعة الثانوية ولسه راجع للأدب والكتابة قريب...بس عموما الكاتب الوحيد هو دكتور نبيل فاروق..مدرسة الأدب بالنسبة ليا..وحاليا فيه الأديبة نجلاء محرم اللى بعد قراية كتبها بقيت بأحب أسلوبها الأدبى جدا واتعلمت منه كتير...بالنسبة بقى للأجانب ياهبة فأنا مع إنى كنت بكتب زمان بالإنجليزى قصص وأشعار وحتى روايات لكن عمرى ماقريت لحد معين ولا حتى سبحت فى بحر الروايات المترجمة..وده للأسف أيضا بسبب تركى للأدب مدة طويلة...
بحييكى ياهبة عالموضوع الجميل

سؤال مهم جدا

عملاق ادب الرعب ادجار الان بو سقوط منزل عائلة أشر

حبيب قلب الملايين بل المليارات هانر كريستان اندرسن و كيف أنسى البطة القبيحة وذات الحذاء الاحمر

تولستلوى انا كارنينا

سومرست موم اغلال الانسانية

الاخوات برونتى وكلهم نكدوا عليا وكانوا مبدعات بس اكتر قصة خلتنى افكر فى الانتحار مرتفاعات ويذرنج

مارك توين فى توم سوير

أن هابسون فى قصص عبير ارياف العذاب


افنيك اساكهيان من ارمينا حكايات العم اوهان

عمر الخيام من ايران رباعيات الخيام وكنت زمان احفظها بالفارسيه بس ده كان زمان هى موسيقى عزف على الوجدان

د. احمد خالد توفيق أسطورة النافاراى

د. منى المرشود سعودية- أنت لى من اروع ما قرات

امرؤ القيس كل شعره كان تسجيل ليومياتة

أمل دنقل - زرقاء اليمامة تنبئ بهزيمة 67

ابو القاسم الشابى خلقت طليقا كضوء الصباح

ابراهيم ناجى الاوراق المحترقة

شالوم عليخم كاتب يهودى فى كتاب المتسولين فضح طرق اليهود فى التسول فى اوربا والكتاب عندى بالعبرية ولسه بجيدها والحمدلله عشان لغة التخصص فى الجامعة

الطاهر بن جلون من المغرب ليلة القدر عن جد رهيبة


ماهر طلبة فى الفران ورغيف الخبز
ايناس حليم فى احتفال رهيبة

د. احمد مراد ملائكة وذئاب

أسامة انور عكاشة فى ثلاثية الحلمية

دول لو دخلت اى مكتبة بدور عليهم

طبعا زى اغلب جيلنا كلنا بدأنا بقرآءات دكتور نبيل فاروق
رجل المستحيل وملف المستقبل وقصصه القصيره اللى كانت فى سلسلة كوكتيل 2000
وكمان المبدع العملاق يوسف ادريس ومحمد المخزنجى ودكتور علاء الاسوانى
وباولو كوهيليو وماركيز

سؤال مهم جدا يا صديقتي الجميلة ....
بصراحة أنا بحب جدا احسان عبد القدوس و ده أكتر كاتب أثر فيا في طريقة تفكيري خاصة في قصته ( لا تطفيء الشمس ) كمان في كتابتي ... أحيانا زميلاتي يقولولي إن إسلوبي فيه شبه من إسلوبه في الكتابة بس طبعا أنا آجي جنبه فين ... كمان بحب يوسف السباعي ...
و كمان بحب جدا نبيل فاروق .... و د/ أحمد خالد توفيق ....
و دلوقتي بحب أقرا ل ( د/ علاء الأسواني ) و عجبتني جدا شيكاغو .....
بالنسبة للأدب العالمي فأنا مش قريت لحد بس بحب روايات عبير و هي روايات مترجمة بالتأكيد كلنا نعرفها ... و بحكم دراستي قريت ل شكسبير و عجبني و كمان عجبني دانيل ديفويه و جورج اورويل و بصراحة الأدب اإنجليزي ممتع بس نفسي أدخل شوية في الأدب الروسي ...

السلام عليكم اختى العزيزة

أكثر كاتب وعالم وفيلسوف أثر فى شخصيتى منذ الطولة هو ( الدكتور مصطفى محمود )
فهو من أحببنى فى الأدب والفلسفة وأحببنى أيضا فى الطب وعالمه .
كم تأثرت به وبكتبه الأدبية والعلمية والدينية وأيضا برنامحه الرائع
فأنا أحبه بقدر ما أؤمن به وأختلف معه
وتسمحولى أستغل هذه الصفحة لأنعى هذا الرجل العظيم حيث رحل عن عالمنا منذ شهر تقريبا
أسأل الله أن يرحمه
كما أ أتأثر أيضا بدكتور نبيل فاروق وقصصه التى أثرت فينا جميعا
كما أقرأ لأبراهيم الفقى وأحمد خالد توفيق

تحيلتى لك ولسؤلك الشيق
أسماء مصطفى

السلام عليكم

كاتبى المفضل الل بحب اقراه له اوى هو استاذ عبد الوهاب مطاوع

وبحب اقرا لانيس منصور ونجيب محفوظ

بحب جين اوستن اوى وبحب اقرا لاجاثا كريستى وأرسين لوبين

سؤال مهم اوى ودائما اجابته بتتغير مع تغير الوقت

السؤال : كاتبك أم كتّابك ؟

إجابة على سؤالك : د. أحمد خالد توفيق .