اعتذار واجب :)

[الأمير الحائر]

أزيكوا كلكوا.. وحشتنى الأكاديمية جدا مع إنى مابعدتش عنها أكتر من يومين حتى فى عز ماكنت تعبان..وده لأن بجد الأكاديمية تعتبر أكتر من بيتى التانى وأعضائها كلهم أخوات ليا ودى مش مجاملة ولا كلام وبس...وكمان صعب بعد ما كنت متواجد دايما ويوميا فى الأكاديمية إنى أبعد عنها مضطرا وياريت بسبب الإمتحانات أو حاجة إنما كان بسبب تعب فى عينيا...
الموضوع ده أولا اعتذار عن تغيبى من الأكاديمية وكمان عن تغيبى عن الكتابة مع إن الفترة اللى فاتت جالى أفكار كتيرة جدا بس ماكنتش أقدر أطول على الجهاز وأقعد أكتبها...وإن شاء الله هأحاول تدريجيا أكتب أفكارى قبل ما أنساها...
الإعتذار التانى والأهم واللى عامل عشانه الموضوع ده من الأساس هو اعتذار للأعضاء اللى أنا رديت وعلقت على أعمالهم فى يوم الخميس 22 يناير...الخميس الأسود بالنسبة ليا...واللى كان أكتر يوم زاد فيه تعب عينيا...لدرجة هأقولكوا على سر يمكن حتى مش قلته لأهلى عشان مش يقلقو عليا يوميها..انى بكل بساطة فى اليوم ده لما كنت بغطى عنيا الشمال ماكنتش بأشوف بعنيا اليمين حاجة خالص غير ضباب أبيض وكان الموضوع صعب أوى ومفاجئ ليا لأن نظرى دايما كان ستة على ستة وكانت غريبة إن مرة واحدة عينى اليمين يحصلها كده...ومع ذلك ( شوفوا التنفيض ) ولا حد عرف فى البيت حاجة عن الموضوع ده خالص ولا فكرت حتى أروح لدكتور...لأنى تخيلت إن ده بس إجهاد من كتر القعدة على الكمبيوتر وكمان القراية كتير لو أنا مش قاعد على الكمبيوتر فكان المجهود على عينيا كبير أوى...وعشان كده ابتديت أريح عنيا من الجهاز وأقلل منه جدا لحد عينيا ماتبقى أحسن...بس حبيت يعنى أجى حتى فى وسط تعبى ده وشوف الأكاديمية والأعمال الجديدة فيها ولقيت أعمال كتيرة جدا أغرتنى ان اقراها كلها حتى مع تعب عنيا وبقيت بقرى بعينى الشمال بس ومخبى عينيا اليمين عشان ماتتعبش أكتر من الشاشة...يعنى كنت بالظبط عامل زى الصورة الشخصية اللى حاططها هنا دلوقتى تحت اسمى
المهم إنى فى اليوم ده كان كذا حد كاتب أعمال جديدة...أحمد الصياد...ومنة... وهبة الله...و كانو ضحايا انى قريت أعمالهم فى اليوم ده بجد...مش على النقد لأن النقد كان عادى وأنا متعود بأقول رأيى بصراحة فى كل الأعمال زى ما بأتمنى إنى اشوف حد بينقد أى عمل بكتبه...ولكن على الطريقة اللى قولت بيها النقد...أنا متعود دايما بأكتب بأسلوب مرح عشان ماحدش يحس إنى بعدل عليه أو يضايق من نقدى ليه...لكن اليوم ده مع تعب عينيا وأنا بقرى الأعمال فحسيت ردودى كلها كانت باردة ورخمة مش زى ما الكل اتعودوا على ردودى حتى لما كنت بنتقد عمل كنت بأخد الموضوع بهزار وضحك وفى نفس الوقت بأبين نقدى....فبجد بأعتذر لكل اللى رديت عليهم على أسلوبى فى الرد و يارب ماحدش يزعل منى لأن بجد زى ماقلت فى الأول بأعتبر كل اللى فى الأكاديمية عائلة حقيقية ليا
ويلا إن شاء الله هأحاول أبقى موجود أكتر تدريجيا كده لحد ماعنيا ترتاح وأرجع تانى أزهقكوا طول اليوم وكمان أرجع لحرب الأحزاب اللى سبتها مضطر بسبب تعبى ده...وأنا سمعت إشاعة فى الجرايد بتقول إن تعب عنيا ده كان حسد من حزب البنات ولا زالت التحقيقات جارية

[لارا]

الف سلامه ياوليد . ان شاء الله تبقى كويس .

[الأمير الحائر]

الله يسلمك يا لارا وبأشكرك بجد والله على اهتمامك وكمان على الـ 3 وردات الجميلة دى

[تنهيدة]

الف الف الف سلامة عليك ياوليد ويارب تكون النهاردة أحسن بس ده مايمنعش أنك ماطولش قدام الجهاز ..وان كان على النقد الا قدمته فكلنا متأكدين ياوليد انك دايما بتحب كل الأعضاء
ودايما عايزنا نكتب أحسن وده بجد أحساس طيب منك جدا وكلنا بنشكرك عليه وأنا متأكدة أن كل الأعضاء دايما بتنتظر ردك على مواضعهم ...حتى لو كان بالنقد ..
بس واللهى ياوليد أنا بريئه من حسد عنيك أنا حسده بس أفكاركم ....أنا شاكه فى احمد ...
الف سلامه مره تانيه ياوليد ويارب تخف بسرعة وترجع تخلص الألف قصة لانى عرفت ان العمل متوقف هناك ...ولو انى عارفة ان رجوعك ده حيكون سبب فى خسارة حزبى بس مش مشكلة ود باقة وردة صغيرة عشان خاطر سلامتك ياوليد شفت أنا طيبه أزاى

[الأمير الحائر]

الله يسلمك ياتنهيدة وشكرا بجد على كلامك الجميل ده كله...و بجد يارب كل اللى برد على أعمالهم دايما بالنقد يفهموا سبب نقدى ده إنى بحب أبقى صريح وأديهم رأيى المتواضع جدا فى أعمالهم...وأعتقد هدف الأكاديمية الأساسى إن إحنا نقرا أعمال بعض ونعلق عليها بكل صدق وكمان بحب ومش برخامة زى ماعملت أنا اليوم ده...وأنا بأفرح جدا لما حد بيقولى ملحوظة على أى عمل كتبته حتى لو شايفها مش صح بحاول أتعلم من النقد ده...وده شئ زاد عندى مؤخرا بعد تجربة ورشة القصة القصيرة فى مؤسسة نجلاء محرم واتعلمت إزاى أستفيد من نقد أعمالى جدا وللأسف كان تعب عينيا ده حائل إنى أكتب أعمال جديدة أفضل على ضوء النقد البناء ده...بس إن شاء الله أقدر أكتب كل أفكارى قريب..
مش جاية تشككى غير فى أحمد ده أحمد من أكتر أعضاء الحزب انتماء يعنى ماتحاوليش ياتنهيدة تعملى زيى لما كنت بشككوا فى مريم وبقولكوا إنها عميلة...مع إنها كانت عميلة فعلا يعنى إنما أحمد لأ وبعدين هو عمل الواجب وزيادة وأنا تعبان وفضلنا كسبانين كسبانين يعنى
بشكرك ياتنهيدة مرة تانية بجد على كلامك وعلى باقة الورد الجميلة دى و يارب لا أنتى ولا حد قريب منك ولا حد من الأكاديمية كمان تتعب عينيه كده أبدا...وأنا دلوقتى هأروح أريح عينى شوية وبالمرة أتغدى كمان

[هبة الله محمد]

ولا يهمك سلامة عينيك..


منه لله الكمبيوتر أبقى اكتب على ورق عادي أحسن وبعدين بيضه براحتك.

[الأمير الحائر]

الله يسلمك ياهبة والله حاولت كذا مرة بس خلاص يعنى خدت على إنى أكتب على الكمبيوتر على طول بدال جمبى عشان ما أكتبش مرتين...وهو ده اللى بهدل عينيا.. ربنا يجازى اللى بيعملوا الشاشات المضروبة دى

[المهاجر]

بص يا عم وليد صلى على النبى الاول كدا وروق والف سلامة
اولا انا قبل الاكاديمية كنت بكتب لنفسى وكانت كتاباتى خواطر بس حلو يا باشا ، ولكن لما وقعت فى ايدى ورقة الاكاديمية بالصدفة ولو مش كانت وقعت بالصدفة ولا كنت هتعرفونى ولا تشوفوا كتاباتى عشان كدا انا ما عنديش خبرة ولا يحزنون وانا اللى عرفته من خلال الاكاديمية هنا ان اغلب الناس يا عرفت الاكاديمية عن طريق البحث او من خلال الفيس بوك او من خلال مواقع الادباء تمام كدا يا باشا يبقى انتوا خبرتكوا احسن منى ، فلما حد فيكو ينقض اعمالى حتى لو نقد شديد ما ازعلش لان معنى كدا ان فيه ناس بتهتم بأعمالى وما بقتش اكتب لنفسى ، يبقى لما ازعل من النقد دا سورى يعنى ابقى حمار ايه لازمتها بقى انى جيت هنا وكتبت انا لا عايز اكسب ولا يحزنون ولعلمك انا مش هاطط امل انى اكسب نهائى ودا لسبب انى لسة ما وصلتش حاجز المسابقات اللى اقدر انافس فيها ، الحاجة الاهم بقى انى بعتبر الاعضاء هنا كلهم الجديد قبل القديم اخواتى وتلاحظ كدا من اغلب ردودى ، فلما حد ينقد اعمالى منهم وازعل ابقى عيل ولا ايه يا معلم يا ريت تكون وصلت الرسالة وادعيلى بقى عشان جدى هوب بيودع

ملحوظة :- انت تلاحظ انى مش بنقد حد وكل ردى على المواضيع بتقول فى جمالها فدا عشان انا نظرتى ليها كدا او فكرى ما وصلش للاحسن عشان انتقد بس