أكاديمية ايجيبت رايت الأدبية

مالك ياجنيهنا يامصرى
قاعد زعلان كده ليه
والنبى تسيبونى فى حالى
ما خلاص مبقتش جنيه
انا متضايق وحزين
وكمان مبنمش الليل
ويا عينى بكلم نفسى
من كتر الآه والويل
دايما قاعد وبفكر
هيبقى مصيرى أيه
أكيد هيبقى الجنه
أصل أنا صبرى مش قليل
بعد ماكنت جنيه له هيبه
وكمان شنه ورنه
دلوقتى بقيت خيبه
ولا تسمع لها زنه
من كتر الضرب فيه
بقيت ماشى بالمورفين
محدش بيجيب سيرتى
ولا حتى الشحاذين
معنتش فاهم حاجه
أنا بيجرى لى كده ليه
أتارى السته منى
بواحد من البيه
دلوقتى ياخد له ضربه
ويبقى العشره بجنيه
بعد ده كله ومش عايزين
أشد فى شعرى
وأبقى حزين
ربنا يسترها عليه
قبل ماأبقى من المرحومين

ايه ده يا أية الجمال ده والله روعة!
أنتى بتكتبى شعر هايل أوى على فكرة! طريقتك فى القصيدة دى تشبه لصلاح جاهين اللى انا بعشق شعره اصلا
أنتى حطاها فى قسم الخواطر ليه دى مكانها قسم الشعر دى قصيدة ولا أحسن من كده
وبالنسبة للجنيه المصرى....ربنا يكون فى عونه بقى
بس بجد روعة يا أيه ومستيين بقى أشعارك اللى جاية ان شاء الله

الكلمات الى فاتت دى ليكى اما الكلمات اللى جاية دى للجنيه

اية منى ليكى كل تحية على شعرك الجميل ده والاجمل ان الشاعر يحس بالناس ويكون شعره بيعبر عن مشاكل الناس ده هو الشاعر الصح
بجد لكى منى كل تقدير و احترام