أكاديمية ايجيبت رايت الأدبية

موال بقاله سنين

وسنين بيتغني

موال كلامه حزين

في القلب له رنة

حكوه كتير قبلنا

وبعدنا

راح يسمعوه عنا

قال كلمة الحق عروسة

عرسانها تتمني

وسطورها جوا الورق كوشة

وحبرها الحنة

خطابها دابوا في سحرها

الكل طالب قربها

لاجل ما يتهني

مليون قلم

مليون لسان

اتقدموا

لفوا وراها

في المداين والغيطان

ما استسلموا

سألوا عليها

كل نسمه

كل همسة

كل صوت عالي

واستفسروا عن مهرها

لقوا مهرها غالي

الكلمة دي جوا القلوب مخنوقه

محتاجة تطلع للفضا وتلالي

محتاجة تعلي فوق جبال الخوف

تعلا وتسبق كل صوت عالي

الكلمة دي عاشت سنين جوانا

جوا النفوس تسأل سؤال حيرانة

مين راح يقول فين الحقيقة

مين يصرخ الصرخة الجريئة

مين ينقذ الكلمة الغريقة

مين راح يمد الإيد ؟!