الإقتراح ده أنا كنت بفكر فيه من مدة..وكنت فى البداية بفكر تأجيل طرحه لبعد الإمتحانات..لكن قررت أعرضه بحيث يخضع للمناقشة من جانب زملائى الأعضاء ومن جانب إدارة الأكاديمية..بحيث لو إن شاء الله اتقبل الإقتراح يبقى موجود فعلا على نهاية الإمتحانات مثلا و كمان الزملاء اللى مش وراهم إمتحانات يستفادوا بيه ويطبقوه...
الإقتراح فى الحقيقة محتاج توضيح كبير وعشان كده أنا هأوضحه فى نقاط بإستفاضة عشان الكل يفهم فكرتى:
الإقتراح:
فتح قسم جديد مستقل..يكون اسمه مثلا ( صفحات الأعضاء الخاصة ) ...وهذا القسم كما هو اسمه سيكون لكل عضو فتح موضوع جديد فيه بعنوان مثلا: ( الأمير الحائر...صفحتى الخاصة على أكاديمية ايجيبت رايت الأدبية ) ويكون الموضوع ده بمثابة أرشيف متجدد لأعمال كل عضو فى الأكاديمية..بمعنى إن يبقى تقسيمة الموضوع ده كالتالى:
.....
قصصى:
رابط قصة 1
رابط قصة 2
رابط قصة.....
خواطرى:
خاطرة 1
خاطرة 2 .....
ردودى على مواضيع التعريف بنفسى:
رابط ردى فى إمتحان التعارف
بكتب ليه وإمتى ولمين...؟( رابط ردى فى هذا الموضوع )
رابط ردى فى موضوع أول مرة كتبت....
وهكذا....
الأهم من الإقتراح...إيه إهدافه؟ دى أهم حاجة عايز أوضحها..عشان الكل يفهمه صح إن شاء الله...
أهداف الإقتراح:
1 - الملفات الخاصة العادية حاليا فى الأكاديمية مخفية عن الزوار..ده غير إنها مش فيها أرشيف كامل ومفصل بتقسيم زى ده عن الأعمال..فلو أنا مثلا كعضو..صديق ليا مش عضو عايز يقرى أعمالى فى الأكاديمية..فهأقوله خش ودور على أعمالى..إنما لما يبقى فيه صفحة خاصة كده هأقدر أديله الرابط للصفحة بكل بساطة عشان يقرى أى نوع أعمال يفضله فى أى وقت. و أنا أعرف موقع فيه خدمة روابط مختصرة ممكن نستخدمها كرابط للصفحة دى..بيبقى الرابط مثلا:
Ahmad.5u.com
يعنى هتبقى أشبه بموقع لكل عضو فى الأكاديمية يعرض فيها أعماله..ويعرضها لأصدقائه لو عايزين يقروا أعماله.
2 - الأقسام متنوعة فى الأكاديمية..و فيه أعضاء كتير مننا بيكتبوا فى كل الأقسام الأدبية مثلا..وساعات بكتشف أعمال ليا أنا كنت ناسيها فى أقسام دى...ومع الوقت هيبقى صعب أرجع أفتكر أنا كتبت ايه فى قسم إيه ومش هأقدر أجيب موضوع ببساطة لو عايزه أو افتكره من الأساس...
كمان..فترة زى دى اللى أنا مثلا بعيد فيها عن الأكاديمية بسبب الإمتحانات وكتير مننا غايبين..وفيه ناس بيكتبوا فى الأكاديمية و هما زى كتابى المفضلين بالظبط..فأكيد لما أرجع هأحب أقرا أعمالهم اللى فاتتنى فصفحة زى كده هتسهل عليا أنى أعرف هما كتبوا إيه جديد وخصوصا إن الأعمال مرقمة زى ماوضحت فى المثال..وبالتالى هنقدر كلنا نتابع أعمال بعض فى أى وقت بعرض الصفحة الخاصة لكل واحد فينا..وممكن كل عضو لما يعمل صفحة يضع الرابط بتاعها ( سواء الأصلى أو لو عمل عنوان مختصر ) فى ملفه الأساسى فى خانة الموقع فتظهر بجانب إسمه كموقعه...أو فى خانة التوقيع أيضا...
3 - صفحة كل عضو هتبقى سجل لأعماله كلها...ومتجدد بمعنى إن بكل بساطة بعد كتابة عمل فى قسم الخواطر مثلا هيدخل و يعدل صفحته سريعا يضيف رقم جديد بإسم العمل ورابط ليه...وهكذا..لنجد بعد كام سنة إن شاء الله إن كل عضو فينا ليه سجل وافى ودقيق لأعماله...ساعات كتير بيحب الكاتب يعرض أعماله أو مواضيعه القديمة فى وقت فراغه...فالسجل ده مع فكرة الرابط كمان هيبقى موقع شخصى ودائم إن شاء الله للعرض فى أى وقت.
4 - وده إقتراح فرعى مصاحب للإقتراح و إختيارى مش أساسى يعنى :
ممكن نعمل قائمة أعضاء جديدة غير قائمة الأعضاء الحالية فى الأكاديمية...قائمة الأعضاء دى تبقى فيها أسماء الأعضاء برابط للصفحة الخاصة بترتيب عملهم ليها مثلا أو أبجديا أو أى ترتيب أخر...و ده هيبقى زى فهرس بكتاب الأكاديمية الفعالين...لأن أكيد فيه أعضاء اشتركوا فى الأكاديمية من زمان ولسه مشاركاتهم صفر...وبالتالى قائمة الأعضاء الجديدة هتوضح الأعضاء النشطين فقط والذين لهم أعمال فى الأكاديمية فعلا لعرضها..
أعتقد أنى أطلت جدا فى شرح الإقتراح...وذلك لكى أنقل لكم الفكرة كما هى فى عقلى تماما..ولكى تتضح أهدافها للجميع إن شاء الله..
أتمنى أن تكون الفكرة مفيدة وتعجب الجميع..و كل تمنياتى بالتميز الدائم للأكاديمية و كتابها... وبقائها مختلفة و متميزة كما عهدناها دائما...