كيف تكون أب مثالى جدا جدا :)

[الأمير الحائر]

أزيكوا...دلوقتى هأكتب نصائح ذهبية إزاى تكون أب مثالى وتعلم ابنك الأخلاق الحميدة...والموضوع مع انه فى قسم شوية ضحك بس مش قصدى منه ضحك ولا هزار أنا بس حبيت أكتب النصائح بطريقة معكوسة وساخرة عشان ماتبقاش دمها تقيل...ايه المقدمات الكتيرة دى...أسيبو تقروا أحسن...
......

الإعتماد على النفس: علم ابنك ازاى يبقى فهلوى زيك ويصلح السباكة والكهربة والمواسير وكل حاجة...أهم حاجة لازم تغرق الشقة أو تتكهرب قدامه مرتين كده عشان يعرف مخاطر المهنة
الصدق: علم ابنك الصدق ولو على حد السيف...وكون أول واحد تقوله يقول لصاحبك فى التيفون مش هنا...أو يكدب ويخبى على مامته ويقولها انك كنت بتذاكرله فى البلكونة مع أنك كنت عاملة حجة عشان تبص على بنت الجيران
الصحة تاج: علمه ان صحته فوق كل شئ والتدخين ضار جدا بالصحة...وكون أول واحد تخليه ينزل يشتريلك سجاير أو يقعد معاك عالقهوة وأنت بتشرب شيشة بطعم الخوخ
الفتنة حرام: علم ابنك مايفتنش أبدا عشان عيب...ووصيه يراقبلك مراتك وأنت مش موجود ويقولك هى كانت بتعمل ايه وبتكلم مين فى التليفون غير عم عبده البقال وعم سمير بتاع الدراى كلين وهيثم بتاع الدليفرى
الرياضة مهمة جدا:علمه أهمية ممارسة رياضة مفيدة واديله درس عملى وخده معاك قهوة سمسم اللى على أخر شارعكوا ووريه إزاى انك بتمارس رياضة الطاولة على المشاريب...وازاى بتخسر بشرف وبتضيف المشاريب على حسابك اللى ما اتفقلش من ساعة ما افتتحوه فى سنة 67
الشجاعة أساس الدفاع عن النفس: علمه إزاى انه لازم يبقى شجاع عشان يدافع عن نفسه...وتعلمه إزاى يمسك المطوة القرن الغزال " ويثبت " اللى قدامه وياخد محفظته بالمرة عشان الحياة صعبة
العلم نور و العمل عبادة: عشان كده لازم يسيب المدرسة اللى واجعلك دماغك بيها دى ويروح يتعلم صنعة تنفعه و يشتغل عند حكشة الميكانيكى اللى جمبكوا
ودى كانت أهم صفات الأب المثالى جدا جدا واللىمن كتر مثاليته مش موجود خالص بس أكيد فيه كتير من الأبهات فيهم صفة أو صفتين مثاليين من دول ولازم يعرفو باقو الصفات عشان يطلعو أولاد مثالية زيهم وغالبا من كتر مثالية الأبن أول حاجة هيعملها هيشكر أبوه وهيجرب فيه درس عملى فى إستخدام المطوة ولا عزاء للمثالية...

[تنهيدة]

طبعا موضوع جميل ومضمونه هايل وياريت فعلا الأباء يقره النصايح المهمه ده وانا متأكدة ان معظمهم حيلاقى واحده فيهم هو بيعملها وأكتر واحد ان شايفة أباء كتير بيعملوه وهى حكاية السجاير ممكن تلاقى الأب بيشرب سجارة لما يكون مضايق وهو مش عارف ان بكده بيعرف ابنه أن السجاير بتهدى الأعصاب وممكن كمان يبعت أبنه يشترى ليه السجاير بجد شىء مؤسف
وكمان الا شدنى من النصايح المثالية أن فيه اباء بتخلى ولاده تحكلهم على الا حصل فى البيت من وراهم وهو مش عارف ان بكده بيعلم أبنه اسوء العادات وفيه كمان أمهات بتعمل نفس الموضوع ...ده غير ان فيه أباء فعلا بتأخد ولاده تصلى وبعد ما تخرج من الصلاة تأخدهم للقهوة قال يعنى بتفسحهم وتخليهم يتفرجو على لعب الطاولة وغيره من السلبيات الكتير الا موجودة فى القهوة وغيره وكتير من الحاجات الا بنعلمها للولادنا من غير مانحس ....
أنا فيه جملة عجبتنى أوى وهى الحساب الا متقفلسش من يوم ماأفتتحوه من سنة 67بجد جملة بتقطر ألم ....
بس انا عندى نصيحة نفسى جميع الأباء والأمهات تسمعها وهى ان لازم نربى نفسنا واحنا بنربى اولادنا ونصلح اخطاءنا عشان نقدر نواجههم عشان نقدر نكون القدوة الاولة فى حياتهم
بجد موضوع جميل وناقشته باسلوب أجمل وعلى فكرة ياوليد ان الطريقة الساخرة فى طرح النصيحة بتكون مفيدة اكتر من النصايح المباشرة والنموذجية وممكن تأثر اكتر فى الناس
بحيك على أسلوبك الكومدى اللذيذ ومستنين موضيع زى دة كتير

[المهاجر]

موضوع رائع يا وليد بس اعذرنى لقصر الرد بس الظروف بقى
ولكن انت نسيت حاجة
تعلموا ازاى يشرب كولة وسجاير